សញ្ញាទាំង៥ដែលបង្ហាញថា សត្វចិញ្ចឹមរបស់អ្នកកំពុងច្រណែននឹងអ្នក

តើអ្នកធ្លាប់សម្គាល់ដែរឬទេថា នៅពេលអ្នកទៅអង្អែលសត្វផ្សេងទៀត សត្វចិញ្ចឹមរបស់អ្នកចាប់ផ្ដើមជ្រៀតខ្លួនចូលទៅចន្លោះរវាងអ្នកនិងសត្វផ្សេងទៀត ហើយរុញអ្នកចេញឱ្
យឆ្ងាយពីសត្វផ្សេងទាំងនោះដែរទេ? ពិតណាស់ នេះគឺជាសកម្មភាពដែលបង្ហាញថាសត្វចិញ្ចឹមរបស់អ្នកកំពុងច្រណែននឹងអ្នក។ យ៉ាងណាមិញ ការច្រណែនរបស់សត្វចិញ្ចឹម មិនមែនមានតែប៉ុណ្ណឹងឡើយ។ ខាងក្រោមនេះ គឺជាសញ្ញាទាំង៥ដែលអាចបង្ហាញថា សត្វចិញ្ចឹមរបស់អ្នកកំពុងច្រណែននឹងអ្នក៖

១- ​ចាប់ផ្ដើមមានអារម្មណ៍ឆេវឆាវ៖ នៅពេលដែលសត្វចិញ្ចឹមរបស់អ្នកចាប់ផ្ដើមច្រណែននឹងអ្នកជាមួយនឹងសត្វដទៃ ពួកវានឹងរត់ទៅខាំសត្វដទៃឬយកមាត់មកខាំដៃអ្នកតិចៗដើម្បីឱ្យអ្នកមកចាប់អារម្មណ៍ពួកគេវិញ។

២- ចូលចិត្តបន្ទោបង់នៅកន្លែងមិនសមគួរ៖ ជាទូទៅនៅពេលដែលសត្វចិញ្ចឹមរបស់ចាប់ផ្ដើមធ្វើសកម្មភាពខុសពីធម្មតាដូចជាចូលចិត្តបន្ទោបង់នៅក្នុងបន្ទប់អ្នកឬនៅកន្លែងដែលមិនគួរបន្ទោបង់ បានន័យថាពួកវាចង់ទទួលការចាប់អារម្មណ៍ពីអ្នកហើយ។ តែសូមបញ្ជាក់ថា សកម្មភាពបន្ទោបង់នេះ ក៏អាចជារោគសញ្ញាដែលបញ្ជាក់ថា សត្វរបស់អ្នកកំពុងឈឺដែរ។ ដូច្នេះ ប្រសិនបើអ្នកឃើញអាការៈបែបនេះ រឿងដំបូងដែលអ្នកគួរឬមិនគួរធ្វើគឺយកពួកវាទៅពេទ្យជាមុនសិន។

៣- តាមអ្នកស្អិតដូចកាវ៖ ប្រសិនបើអ្នកសម្គាល់ឃើញថាសត្វចិញ្ចឹមរបស់ចាប់ផ្ដើមតាមអ្នកជាប់រហូត ព្រមទាំងព្យាយាមឱបអ្នក ឬលិឍដៃ ឬក៏មុខរបស់អ្នក បានន័យថាពួកវាកំពុងច្រណែនជាមួយនឹងសត្វដទៃ ហើយពួកវាចង់អ្នកយកចិត្តទុកដាក់មកលើពួកវាជាងសត្វផ្សេងៗទៀត។

៤- ចាប់ផ្ដើមខឹង ព្រុស និងគ្រហឹម៖ អ្នកប្រាកដជាធ្លាប់បានឃើញស្ថានភាពបែបនេះរួចមកហើយមែនទេ? នៅពេលអ្នកទៅអង្អែលសត្វផ្សេងទៀត ពិតណាស់ថាពួកវានឹងបង្ហាញអាកប្បកិរិយាច្រណែន ដោយចាប់ផ្ដើមខឹង ព្រុស ឬគ្រហឹមទៅកាន់សត្វដទៃទៀតជាដើម។

៥- ចាកចេញពីអ្នក៖ នៅពេលដែលសត្វចិញ្ចឹមរបស់អ្នកច្រណែននឹងអ្នក ជំនួសដោយការខឹង វានឹងចាកចេញពីអ្នកភ្លាមទាំងទឹកមុខក្រៀមក្រំ។ វាអាចនឹងគិតថា អ្នកលែងត្រូវការវាទៀតហើយ។

------------------

ប្រែសម្រួលនិងរៀបរៀងដោយ៖ ជ័ង យៀកលីន

ពិនិត្យនិងកែសម្រួលដោយ៖ ជុំ អូវីស្សា

© គ្រឹះស្ថានស្រាវជ្រាវនិងបោះពុម្ពផ្សាយហាតប៊ុក

HeartBookCambodia

ប្រភព៖

·        https://www.petmd.com/dog/behavior/9-signs-your-pet-jealous-and-how-stop-it