៥យុទ្ធសាស្រ្តក្នុងការគ្រប់គ្រងការខកចិត្ត

 

           ជាទូទៅ នៅពេលដែលលទ្ធផលមិនស្របតាមការរំពឹងទុក ហើយក្តីសង្ឃឹមរបស់អ្នកក៏ត្រូវច្រានចោល នោះអ្នកនឹងទទួលអារម្មណ៍ខកចិត្ត ដែលធ្វើឱ្យអ្នកមានអារម្មណ៍សោកសៅ អន់ចិត្ត ការបាត់បង់ និងកំហឹង ដែលអាចមានផលប៉ះពាល់ដល់អាកប្បកិរិយានៅពេលអនាគត។​ ជាការពិត នៅពេលដែលអ្នករំពឹងអ្វីមួយកាន់តែខ្លាំង​ នោះការខកចិត្តក៏កាន់តែធំដែរ។ ហេតុនេះហើយអ្នកត្រូវមានការគ្រប់គ្រងការខកចិត្តចំពោះខ្លួនឯង ព្រោះប្រសិនបើអ្នកអាចគ្រប់គ្រងវាបាន នោះនឹងជួយអ្នកឱ្យទប់ស្កាត់ការខឹងសម្បារដែលមិនអាចរារំាងអ្នកក្នុងការស្វែងរកការផ្លាស់ប្តូរនិងឱកាសឡើយ។ ខាងក្រោមនេះ គឺជាយុទ្ធសាស្រ្តទាំង៥សម្រាប់ការគ្រប់ការខកចិត្ត៖

១- ចងចាំហេតុផលដែលអ្នកចាប់យកឱកាសដំបូង

           ពេលចួបការខកចិត្ត អ្នកត្រូវគិតវិញថា ពីដើមឡើយអ្នកចាប់ផ្ដើមក្នុងគោលបំណងអ្វី ហើយនៅពេលដែលចាប់ផ្ដើមអ្នកត្រូវគិតពីភាពខកចិត្តដែលអាចកើតមានឡើងព្រោះនៅពេលចាប់ផ្ដើមដំបូងគ្មានអ្នកណាអាចជោគជ័យ១០០ភាគរយនោះទេ។

២- ទទួលស្គាល់អារម្មណ៍របស់អ្នក

           ប្រសិនបើអ្នកចង់បានអ្វីមួយ ប៉ុន្តែត្រូវគេបដិសេធ អ្នកនឹងទទួលអារម្មណ៍ខកចិត្តជាក់ជាមិនខាន។ តួយ៉ាង អ្នកចង់មានការងារធ្វើ ប៉ុន្តែត្រូវគេបដិសេដ អ្នកនឹងមិនសប្បាយចិត្តនោះទេ។ ដូច្នេះហើយអ្នកមិនគួររំពឹងលើលទ្ធផលខ្លាំងពេកនោះទេគឺត្រូវរៀនទទួលស្គាល់និងទទួលយកលទ្ធផល ព្រោះការទទួលយកអារម្មណ៍នៃការខកចិត្ត នឹងជួយអ្នកឱ្យកាត់បន្ថយការខកចិត្ត។ ជាងនេះទៅទៀត ការទទួលស្គាល់ការខកចិត្តរបស់ខ្លួនឯង នឹងធ្វើឱ្យអ្នកកាន់តែស្គាល់ខ្លួនឯងកាន់តែច្បាស់ដែរ។

៣- វាយតម្លៃការរំពឹងទុក

           តើការរំពឹងទុករបស់អ្នកប្រាកដនិយមដែរឬទេ? វាអាស្រ័យលើចម្លើយរបស់អ្នក អ្នកអាចនឹងផ្លាស់ប្តូរវិធីសាស្រ្តនិងការរំពឹងទុករបស់អ្នក។ នៅក្នុងសៀវភៅ “Westward Ho” ដែលលោក សាមែអែល Samuel Beckett បានសរសេរថា “ព្យាយាមម្តងទៀត”, “បរាជ័យម្តងទៀត”, “បរាជ័យគឺកាន់តែប្រសើរ”។​ ទោះបីគាត់មិនមានបំណងប្រើពាក្យនេះបំផុសគំនិតក៏ដោយ ប៉ុន្តែពាក្យទាំងនេះត្រូវបានបកស្រាយតាមរបៀបផ្សេងៗ និងបន្ថែមពាក្យផងដែរ។ តួយ៉ាងពួកគេបានបន្ថែមពាក្យថា ព្យាយាមម្តងទៀតនឹងជោគជ័យ។ យ៉ាងណាមិញ នៅពេលដែលការរំពឹងទុកដូចគ្នានឹងលទ្ធផល នោះនឹងមិនធ្វើឱ្យមានការខកចិត្តនោះទេ ដូច្នេះអ្នកត្រូវវាយតម្លៃការរំពឹងទុកតាមលទ្ធផលដែលអ្នកអាចសម្រេចបាន។

៤- កំណត់កម្រិតនៃការរំពឹងទុក

           នៅពេលដែលអ្នកមានគំនិតអ្វីមួយប៉ុន្តែត្រូវគេបដិសេដ គឺមិនមានន័យថា គំនិតបន្ទាប់របស់អ្នកនឹងត្រូវគេបដិសេធទៀតនោះទេដូចជាត្រូវគេបដិសេធការងារបន្ទាប់ពីបញ្ចប់ការសិក្សាម្តងឬច្រើនដង មិនមែនមានន័យថាអ្នកត្រូវឈប់ដាក់ពាក្យរកការងារនោះទេ។ យ៉ាងណាមិញ បន្ទាប់ពីការបដិសេដក៏ដោយ ក៏អ្នកអាចសួរសាស្រ្តាចារ្យនិងសិស្សផ្សេងទៀតដើម្បីទទួលបានមតិកែលម្អ អ្នកនឹងទទួលបានចំណេះដឹងថ្មី និងផ្លាស់ប្តូរវិធីសាស្រ្តរបស់អ្នកនៅឆ្នាំបន្ទាប់។ ដូច្នេះ នៅពេលដែលអ្នកចួបការខកចិត្ត គឺវាគ្រាន់ជាលទ្ធផលខកចិត្តតែប៉ុណ្ណោះ គឺមិនបានធ្វើឱ្យមនុស្សខកចិត្តឡើយ។

៥- ការគិតបែបវិជ្ជមាននៃព្រឹត្តការណ៍

           បន្ទាប់ពីលទ្ធផលខកចិត្ត អ្នកអាចផ្តោតលើការស្វែងរកអត្ថប្រយោជន៍ ព្រោះការខកចិត្តបានបង្រៀនអ្នកថា អ្នកអាចយកឈ្នះបាននិងបង្កើនភាពអត់ធ្មត់ឱ្យខ្លួនឯង។ ជាការពិត ការគិតវិជ្ជមានចំពោះការខកចិត្តគឺអាចអនុញ្ញាតឱ្យអ្នកលះបង់ថាមពលដើម្បីឱកាសថ្មីៗ ហើយការគិតវិជ្ជមានលើការខកចិត្តតិចតួចរបស់អ្នក គឺអាចជួយអ្នកកែលម្អភ្លាមៗ។ ដូច្នេះ សូមគិតវិជ្ជមានចំពោះការខកចិត្តនិងអភិវឌ្ឍខ្លួនឱ្យកាន់តែប្រសើរជាងមុន។

           សរុបមក​ ដើម្បីគ្រប់គ្រងការខកចិត្ត គឺអ្នកត្រូវចំណាយពេលចងចាំហេតុផលជាក់លាក់សម្រាប់ការខិតខំប្រឹងប្រែងរបស់អ្នក ដែលផ្តល់នូវតម្លៃនៃការយល់ឃើញលើលទ្ធផលខកចិត្តកន្លងមក។ ជាមួយគ្នានេះដែរ ការទទួលស្គាល់ពីអារម្មណ៍ខកចិត្តរបស់ខ្លួន ក៏កាត់បន្ថយការខកចិត្តផងដែរ ហើយការវាយតម្លៃភាពខុសគ្នារវាងការរំពឹងទុកនិងលទ្ធផល អាចបង្ហាញពីវិធីសាស្រ្តដើម្បីសម្រេចតាមអ្វីដែលអ្នកចង់បាន។

----

ប្រែសម្រួលនិងរៀបរៀងដោយ៖ ទូច ណេង

កែសម្រួលដោយ៖ ជុំ អូវីស្សា

© គ្រឹះស្ថានស្រាវជ្រាវនិងបោះពុម្ពផ្សាយហាតប៊ុក

ប្រភពអត្ថបទ៖ PsychologyToday