ទ្វីបអង់តាកទិក៖ តើមាននរណាដែលអាចរស់នៅតំបន់ត្រជាក់ជាងគេលើលោកនេះបាន?

 

ទ្វីបអង់តាកទិក គឺជាទ្វីបមួយក្នុងចំណោមទ្វីបទាំងអស់លើភពផែនដី ដែលមានផ្ទៃដីសរុប១៤លានគីឡូម៉ែត្រការ៉េ ក្នុងនោះមានផ្ទៃដី២៨០​ ០០០គីឡូម៉ែត្រការ៉េតែប៉ុណ្ណោះដែលមិនគ្របដណ្តប់ដោយទឹកកក។ ដោយឡែក ផ្ទៃដី១៣.៧២លានគីឡូម៉ែត្រការ៉េទៀត(៩៨ភាគរយ) គឺពោរពេញដោយទឹកកកដែលគ្របដណ្តប់ពាសពេញផ្ទៃទ្វីប។ ទំហំទ្វីបនេះធំជាងទ្វីបអូសេអានីដល់ទៅពីរដង ហើយជាទ្វីបលំដាប់ទីប្រាំដែលមានទំហំធំជាងគេបន្ទាប់ពីទ្វីបអាស៊ី អាហ្រ្វ៊ិក អាម៉េរិកខាងជើង និងអាម៉េរិកខាងត្បូង។ ទ្វីបអង់តាកទិកស្ថិតនៅប៉ូលខាងត្បូង ហើយប្រទេសដែលនៅជិតទ្វីបនេះមានដូចជាប្រទេសអាហ្រ្វ៊ិកខាងត្បូង អូស្ត្រាលី នូវែលសេឡង់ ស៊ីលី និងអាហ្សង់ទីន។

ទ្វីបអង់តាកទិក ត្រូវចាត់ទុកថាជាទ្វីបដែលត្រជាក់ ស្ងួត និងមានខ្យល់ខ្លាំងជាងគេបំផុតនៅលើពិភពលោក។ ទ្វីបនេះឆ្ងាយដាច់ស្រយាលពីតំបន់ឯទៀត ព្រមទាំងមិនមានមធ្យោបាយធ្វើដំណើរដូចជាស្ពានឬដងភ្នំដែលផ្តល់ភាពងាយស្រួលដល់មនុស្សគ្រប់មជ្ឈដ្ឋានក្នុងការធ្វើដំណើរដល់ទីនោះទេ ហើយទ្វីបនេះស្ថិតនៅដាច់ដោយឡែកទាំងស្រុងពីមនុស្សលោក អស់កាលជាង៣៥លានឆ្នាំមកហើយ។ រហូតមកដល់ឆ្នាំ១៨២០ ក៏ចាប់ផ្តើមមានមនុស្សរកឃើញទ្វីបនេះ ប៉ុន្តែរហូតមកដល់បច្ចុប្បន្ន មិនទាន់មានក្រុមជនជាតិឬក្រុមមនុស្សដែលបានរស់នៅជាប់លាប់ឬមានការសាងសង់បង្កើតជាបណ្តុំភូមិឬទីក្រុងនៅទីនោះឡើយ។

ដោយឡែក ទោះបីមិនមានមនុស្សរស់នៅជាអចិន្រ្តៃយ៍ក្នុងតំបន់នេះក៏ដោយ ក៏មានអ្នកវិទ្យាសាស្ត្រជាច្រើនរូបជុំវិញពិភពលោកបានស្នាក់នៅលើទ្វីបនេះ ដើម្បីសិក្សាអំពីកត្តាអាកាសធាតុ បម្រែបម្រួលនៃផ្ទាំងទឹកកកនៅលើផ្ទៃទ្វីប ការរលាយទឹកកក​ដោយសារការកើនឡើងនូវកម្តៅផែនដី ជាដើម។ ក្រៅពីនេះ ក៏មានអ្នកទេសចរជាច្រើនដែលចង់ដឹងចង់ស្គាល់ទ្វីបនេះ ហើយបានធ្វើដំណើរមកទស្សនានិងឈ្វេងយល់បន្ថែមពីលក្ខខណ្ឌរស់នៅនៃទ្វីបនេះដែរ។ ជាក់ស្តែង ចន្លោះខែតុលាដល់ខែមេសារៀងរាល់ឆ្នាំ ដែលជាខែក្តៅ មានអ្នកវិទ្យាសាស្ត្រប្រមាណជា៥​ ០០០នាក់ មករស់នៅលើទ្វីបនេះ ហើយមានអ្នកទេសចរប្រមាណ៤៥​ ០០០នាក់ ដែលធ្វើដំណើរតាមរយៈកប៉ាល់។ នារដូវរងា ចំនួនអ្នកធ្វើដំណើរមកទ្វីបនេះសល់ត្រឹម១ ០០០នាក់តែប៉ុណ្ណោះ ដែលសុទ្ធសឹងតែជាអ្នកវិទ្យាសាស្ត្រ។ អ្នកវិទ្យាសាស្ត្រទាំងនោះរស់នៅក្នុងស្ថានីយស្រាវជ្រាវផ្ទាល់តែម្តង ដែលជាស្ថានីយជាតិតំណាងបណ្តាប្រទេសផ្សេងៗគ្នា ដែលបានចំណាយទុនក្នុងការសិក្សាអំពីទ្វីបនេះ។ តួយ៉ាង ស្ថានីយស្រាវជ្រាវមានសរុបប្រមាណ៦០កន្លែង។

ពេលនិយាយដល់ថ្ងៃអនាគត ថាតើមនុស្សអាចរស់នៅលើទ្វីបអង់តាកទិកបានដែរឬទេ? ចម្លើយគឺអាច ប៉ុន្តែអាចរស់នៅបានតែភាគខាងជើងនៃទ្វីបនេះប៉ុណ្ណោះ ដោយសារមានរុក្ខជាតិមួយចំនួនអាចដាំលើដីភាគខាងជើងបាន។ ទោះជាយ៉ាងណាក៏ដោយ ក៏មិនទាន់មានការសិក្សាស្រាវជ្រាវណាដែលអាចបញ្ជាក់ថា​ នគររូបនីយកម្មលើទ្វីបនេះអាចទទួលជោគជ័យដែរ។

-------------

អត្ថបទរៀបរៀងនិងប្រែសម្រួលដោយ៖ លី អ៊ុកខា

កែសម្រួលដោយ៖ ជ័ង យៀកលីន

© គ្រឹះស្ថានស្រាវជ្រាវនិងបោះពុម្ពផ្សាយហាតប៊ុក

HeartBookCambodia

ឯកសារយោង៖

-       Gallo, N.  (2022). Do people live in Antarctica? Aurora Expeditions. Retrieved from https://www.auroraexpeditions.com.au/blog/do-people-live-in-antarctica/.

-       Nations Online (n.d.) Physical Map of Antarctica. Retrieved from https://www.nationsonline.org/oneworld/map/antarctica_map.htm.