គន្លឹះទាំង៣ដែលជួយជំរុញទឹកចិត្តអ្នកឱ្យធ្វើការងារជាប្រចាំ

 

ការរៀនពីរបៀបជំរុញទឹកចិត្តក្នុងការធ្វើការងារជារៀងរាល់ថ្ងៃ គឺជាបញ្ហាទូទៅមួយដែលកើតមានឡើងចំពោះមនុស្សគ្រប់រូប មិនថាអ្នកស្រលាញ់ឬស្អប់ការងាររបស់អ្នកនោះទេ។ ប្រសិនបើអ្នកស្អប់ការងាររបស់អ្នក វាពិតជាពិបាកក្នុងការស្វែងរកកម្លាំងចិត្តសម្រាប់ការងារ។

ខាងក្រោមនេះ គឺជាគន្លឹះដែលអ្នកអាចនឹងទទួលបានការលើកទឹកចិត្តសម្រាប់បំពេញការងារជាប្រចាំ៖

១- តែងតែលើកទឹកចិត្តខ្លួនឯងនិងរំឭកខ្លួនឯងអំពីហេតុផលដែលអ្នកធ្វើការងារជាប្រចាំ៖ អ្នកត្រូវគិតវិជ្ជមាននិងប្រាប់ខ្លួនឯងថា ខ្ញុំអាចធ្វើបាន ព្រមទាំងគិតអំពីហេតុផលដែលអ្នកត្រូវធ្វើការងារទាំងនោះ ថាតើហេតុអ្វីបានជាអ្នកមិនត្រូវធ្វើការជារៀងរាល់ថ្ងៃ? ហើយអ្នកធ្វើការរាល់ថ្ងៃដើម្បីអ្វី? នៅពេលដែលអ្នកគិតអំពីសំណួរទាំងអស់នេះហើយ អ្នកនឹងមានកម្លាំងចិត្តដើម្បីបំពេញការងារនោះ។

២- បំបែកកិច្ចការធំទៅជាគោលដៅតូចៗ៖ ប្រសិនបើអ្នកដឹងថា អ្នកមានកិច្ចការឬគម្រោងធំមួយកំពុងរង់ចាំអ្នកនៅកន្លែងធ្វើការ វាពិតជាអាចបំបាក់ទឹកចិត្តអ្នក ហើយអ្នកនឹងមានអារម្មណ៍តានតឹងមុនពេលទៅដល់។ ដើម្បីកាត់បន្ថយការព្រួយបារម្ភក្នុងការងារនោះនិងអាចឱ្យអ្នកមានអារម្មណ៍ល្អនិងមានកម្លាំងចិត្តបំពេញការងារ អ្នកគប្បីបំបែកកិច្ចការធំណាមួយដែលអ្នកមានទៅជាគោលដៅតូចៗ។

៣- អបអរសាទរលទ្ធផលធំនិងតូច៖​ ពេលដែលអ្នកមិនមានអារម្មណ៍ធ្វើការ​ មធ្យោបាយដ៏មានប្រសិទ្ធភាពបំផុតនោះគឺការបង្វែរវាមកជាបង្កើតការលើកទឹកចិត្ត។ អ្នកអាចផ្ដល់រង្វាន់ដល់ខ្លួនឯង ប្រសិនបើអ្នកបំពេញកិច្ចការរួចរាល់ ដូចជា ការដើរកម្សាន្តឬជួបជុំមិត្តភក្តិបន្ទាប់ពីសម្រាកពីការងារ ជាដើម។ មិនថាអ្នកជ្រើសរើសរង្វាន់អ្វីនោះទេ គ្រាន់តែប្រាកដថាវាជារង្វាន់ដែលពិតជាធ្វើឱ្យអ្នករំភើប ហើយអ្នកទន្ទឹងរង់ចាំ ព្រមទាំងឱ្យអ្នកមានកម្លាំងចិត្តដល់ការបំពេញការងារ។

------

ប្រែសម្រួលដោយ៖ ឈួ អនអ៊ី

អត្ថបទដោយ៖ ជុំ អូវីស្សា

©គ្រឹះស្ថានស្រាវជ្រាវនិងបោះពុម្ពផ្សាយហាតប៊ុក

HeartBookCambodia

ប្រភព៖ Lifehack