តើអ្នកបានដឹងអ្វីខ្លះអំពីការរៀបចំផ្កា?

ការរៀបចំផ្កាគឺជាវិធីសាមញ្ញ និងផ្ដល់នូវបរិយាកាសដ៏ល្អក្នុងការរៀបចំទីកន្លែងស្វាគមន៍ កម្មវិធីផ្សេងៗ និងការបង្កើតនូវបរិយាកាសស្រស់ស្រាយក្នុងការរស់នៅប្រចាំថ្ងៃ។ ផ្កាជារុក្ខជាតិលំអ និងមានឥទ្ធិពលជាវិជ្ជមានដល់អារម្មណ៍របស់មនុស្ស។ ការរៀបចំផ្កាទៅតាមបែបបទនីមួយៗ តែងផ្ដល់នូវសារៈសំខាន់ដូចជា ជួយធ្វើឱ្យមានអារម្មណ៍ល្អ ផ្លាស់ប្ដូរបរិយាកាស បង្ហាញពីភាពច្នៃប្រឌិតក្នុងទម្រង់សិល្បៈ ផ្សារភ្ជាប់ទៅនឹងជំនឿបែបសាសនា បង្ហាញពីសេចក្ដីស្រលាញ់និងសេចក្ដីគោរព ក៏ដូចជារៀបចំជាអំណោយផងដែរ។ បន្ថែមពីនេះ ផ្កាក៏ត្រូវបានគេច្នៃធ្វើជាភួង ជាបាច់ តុបតែងនៅក្នុងថូ និងនៅក្នុងវត្ថុ          អនុស្សារីយ៍ ហើយក៏មានលម្អនៅលើម្ហូបនំចំណីផងដែរ។

នៅក្នុងវប្បធម៌ចិន ទម្រង់សិល្បៈនេះមានប្រវត្តិជាង ៣,០០០ ឆ្នាំ មកហើយ ភ្ជាប់ជាមួយនឹងរចនាបទផ្សេងៗជាច្រើន។ នៅតំបន់អាស៊ីបូព៌ា ប្រទេសចិនជាប្រភពដើមនៃសិល្បៈនេះ និងតំណាងឱ្យប្រភេទនៃការរៀបចំផ្កា។ ឥទ្ធិពលនៃសាសនាបុព្វកាល បុព្វបុរសចិនជឿថា មនុស្សនិងរុក្ខជាតិមានទំនាក់ទំនងតាមផ្លូវវិញ្ញាណ ឬការអធិដ្ឋាន។ ដូច្នេះហើយបានជាគេប្រើ           រុក្ខជាតិផ្កាជាតង្វាយដល់ឋានសួគ៌ ការបួងសួង និងអរគុណដល់បុព្វបុរស ក៏ដូចជាបារមីវត្ថុសក្ដ័សិទ្ធទាំងឡាយ។ នៅក្នុងឆ្នាំ២០០៨ សិល្បៈរៀបចំផ្កានេះត្រូវបានបញ្ចូលក្នុងបញ្ជីបេតិកភណ្ឌវប្បធម៌អរូបីរបស់ជាតិចិន។ ក្នុងសម័យទំនើបនេះ ការរៀបចំផ្កាមិនត្រឹមតែជាសិល្បៈតុបតែងលម្អទេ វាក៏ជាវិធីសាស្រ្តជួយសម្រួលដល់ផ្នែកអារម្មណ៍ សម្រាប់អ្នកមានជីវិតដ៏រវល់ជាមួយភាពស្មុគស្មាញផងដែរ។ 

ចំណែកនៅក្នុងវប្បធម៌របស់ជនជាតិជប៉ុន «Ikebana» មានន័យត្រង់ថា «ផ្កាដ៏រស់រវើក» តែអត្ថន័យពិតមានន័យថាជាសិល្បៈនៃការរៀបចំផ្កា ដែលដូចគ្នាទៅនឹងសិល្បៈគំនូរ និងចម្លាក់ដែរ។ សិល្បៈនេះបាននាំចូលមកពីប្រទេសចិនប្រហែលនៅសតវត្សទី៧ តាមរយៈឥទ្ធិពលព្រះពុទ្ធសាសនា។ ភាពពេញនិយមនៃសិល្បៈក្នុងការរៀបចំផ្ការបស់ជប៉ុន ត្រូវបានគេលើកឡើងថាមានភាពទាក់ទាញ និងទំនើបជាងវិធីសាស្រ្តនៃការរៀបចំផ្កាធម្មតាដែលមានក្នុងវប្បធម៌ផ្សេងទៀត។ ការរៀបចំផ្កានេះ មានមូលដ្ឋានគ្រឹះ ៤  ប្រភទសំខាន់ ដែលមានអត្ថន័យ និងការតុបតែងផ្សេងគ្នា និងមានធាតុសំខាន់ ៩ ចំណុច ដោយគោលសំខាន់គឺធ្វើឱ្យផ្កាមានភាពរស់រវើក និងភ្ជាប់ជាមួយអត្ថន័យនៃជំនឿ។ 

-----

ប្រែសម្រួលដោយ៖ ស្រ៊ឺ អេងនាង

កែសម្រួលដោយ៖ ជ័ង យៀកលីន

© គ្រឹះស្ថានស្រាវជ្រាវ និងបោះពុម្ពផ្សាយហាតប៊ុក

​ប្រភព៖ 

-China Today (DENG DI, 2021). The Art of Traditional Chinese Flower Arranging. Retrieved from: 

-http://www.chinatoday.com.cn/ctenglish/2018/cs/202111/t20211119_800263877.html

-Japan Objects (2022). Ikebana: All You Need to Know About Japanese Flower Art. Retrieved from: https://japanobjects.com/features/ikebana

-Terra Plants and Flowers (2019). WHY ARE FLOWER ARRANGEMENTS SO IMPORTANT? Retrieved from: https://terraplantsandflowers.ca/blogs/news/why-are-flower-arrangements-so-important.