ឈ្វេងយល់បន្ថែមអំពីផ្លែប៉ោម

 

មនុស្សជាច្រើនគឺសុទ្ធតែដឹងថាផ្លែប៉ោមមានប្រយោជន៍ល្អសម្រាប់សុខភាព។ ផ្លែប៉ោមសម្បូរដោយជាតិទឹក ជាតិសរសៃរ វីតាមីនជាច្រើនប្រភេទ (វីតាមីន C, E, B, K…) ហើយជួយការពារជំងឺបេះដូង ជំងឺទឹកនោមផ្អែម ជំងឺមហារីក ព្រមទាំងជួយដល់ការសម្រកទម្ងន់ផងដែរ។

អ្វីដែលពិសេសជាងនេះ សារធាតុស្ករនិងសរសៃរនៅក្នុងផ្លែប៉ោមអាចជួយឱ្យអ្នកស្វាងសា្មរតីបានល្អជាងកាហ្វេទៅទៀត។ ប្រសិនបើអ្នកទទួលទាន​ផ្លែប៉ោម​នៅពេល​ព្រឹកវា​នឹងជួយឱ្យអ្នក​មានអារម្មណ៍ស្រស់ថ្លា ហើយស្វាងពីការងងុយគេង។ ប្រសិន​បើ ​អ្នកទទួលទាននៅពេលយប់ វានឹងជួយឱ្យអ្នកគេងលក់ស្រួលដោយសារក្នុងផ្លែប៉ោមមានផ្ទុកសារធាតុមេឡាតូនីន។ បន្ថែម​ពីនេះ យោងការសិក្សាមួយបានឱ្យដឹងថា ទឹកផ្លែប៉ោមក៏អាចជួយការពារការថយចុះនៃផ្លូវចិត្ត និងជំងឺភ្លេចភ្លាំងផងដែរ។ សារធាតុគ្យូអឺសេទីន (Quercetin)  នៅក្នុងផ្លែប៉ោមអាចការពារខួរក្បាលរបស់អ្នកពីការខូចខាតដែលបណ្តាលមកពីភាពតានតឹងដោយអុកស៊ីតកម្ម និងស្ត្រេស។

យ៉ាងណាមិញ ក្រៅពីផ្ដល់អត្ថប្រយោជន៍ដល់សុខភាព ក៏នៅមានជំនឿផ្សេងៗទាក់ទងនឹងផ្លែប៉ោមផងដែរដូចជាតំណាងឱ្យ​ភាពចម្រុងចម្រើន សេចក្ដីស្រលាញ់ ភាពសប្បាយរីករាយ ចំណេះដឹង ប្រាជ្ងា និងការកើតនិងស្លាប់។ សម្រាប់ជនជាតិ​ចិន​វិញ មានជំនឿថាផ្លែប៉ោមតំណាងឱ្យភាពសុខសាន្ត។ ក្រៅពីនេះយើងឃើញថា ផ្លែប៉ោមក៏ត្រូវបានអ្នកនិពន្ធ​យកជា​តំណាង​នៅក្នុង​សាច់​រឿង​ផ្សេងៗ​ផង​ដែរ។

-----

ប្រែសម្រួលដោយ៖ ស្រ៊ឺ អេងនាង

កែសម្រួលដោយ៖ ជុំ អូវីស្សា
រក្សាសិទ្ធិដោយ៖ គ្រិះស្ថានស្រាវជ្រាវ និងបោះពុម្ពផ្សាយហាតប៊ុក

INSIDER (Erin FitzGerald, Spoon University Jun 6, 2017).  8 breakfast foods that will give you as much energy as coffee. Retrieved from https://www.businessinsider.com/breakfast-foods-that-will-give-you-as-much-energy-as-coffee-2017-6#apples-1

Healthline (January 5, 2022). 8 Impressive Health Benefits of Apples. Retrieved from https://www.healthline.com/nutrition/how-apples-affect-weight#benefits

WisdomPortal.com (Peter Y. Chou, 2010). Apple Symbolism. Retrieved from http://www.wisdomportal.com/Poems2010/AppleSymbolism.html