បន្លែ៤ប្រភេទដែលល្អចំពោះសុខភាព

ជាធម្មតា សារពាង្គកាយរបស់មនុស្សតែងតែត្រូវការនូវសារធាតុចិញ្ចឹមដែលអាចជួយជំរុញកោសិកា សរីរាង្គ និងប្រព័ន្ធស៊ាំឱ្យមានដំណើរការលូតលាស់បានល្អតាមមុខងារនីមួយៗរបស់វា នោះនឹងធ្វើឱ្យយើងមានសុខភាពល្អនិងមិនងាយឆ្លងឬកើតនូវជម្ងឺផ្សេងៗឡើយ។ 

ជាក់ស្តែងណាស់ បន្លែ ជាអាហារដែលមានសារៈសំខាន់ខ្លាំងណាស់ក្នុងការបំប៉នសរីរាង្គខាងក្នុងនៃសារពាង្គកាយមនុស្ស។ ម្យ៉ាងវិញទៀត បន្លែ ក៏ផ្ទុកនូវប្រូតេអ៊ីន វីតាមីន និងសារធាតុចិញ្ចឹមទ្រទ្រង់សំខាន់ៗដទៃទៀតផងដែរ។

១- ខាត់ណា (Broccoli)

យោងតាមវិទ្យាស្ថានជាតិសិក្សាពីជំងឺមហារីក (National Cancer Institute) តាមរយៈការសិក្សាស្រាវជ្រាវទៅលើសត្វបានបង្ហាញឱ្យដឹងថា សារធាតុជាច្រើនត្រូវបានគេឱ្យឈ្មោះថា Indoles និង Isothiocyanates ដែលមាននៅក្នុងខាត់ណាអាចជួយបំប៉ននិងរារាំងទប់ស្កាត់ពីការវិវត្តនៃជំងឺមហារីកនៅផ្នែកមួយចំនួនដូចជា តម្រងនោម សុដន់  ថ្លើម និងក្រពះ។  ម្យ៉ាងវិញទៀត វាក៏អាចជួយការពារកោសិកាពីការបំផ្លាញដោយ ADN (DNA) ព្រមទាំងភ្នាក់ងារអសកម្មមួយចំនួនដែលអាចនឹងបង្កឱ្យមានជំងឺមហារីក និងមានឥទ្ធិពលប្រឆាំងនឹងការរលាកជាដើម។

២- ដំឡូងជ្វា (Sweet Potato)

ដំឡូងជ្វា ត្រូវបានគេចាត់ទុកជាបន្លែផងនិងជាផ្លែឈើផងដែរ។ សំបករបស់វាអាចផ្តល់នូវថាមពល១០៣កាឡូរី និងខ្លាញ់ចំនួន០.១៧ក្រាម។ លើសពីនេះ វាផ្ទុកនូវវីតាមីនអា (A) វីតាមីនសេ (C) 25% ថាមពល B6 ប៉ូតាស្យូម 12% សម្បូរជាតិសរសៃ (Fiber) និងបេតាការ៉ូទីន (Beta Carotene) ដែលអាចជួយក្នុងការពង្រឹងដល់សុខភាពចក្ខុវិញ្ញាណ គ្រប់គ្រងសម្ពាធឈាម និងជួយប្រឆាំងដល់ជំងឺមហារីកផងដែរ។

៣- ការ៉ុត (Carrot)

ការ៉ុត មានផ្ទុកថាមពល52កាឡូរីនិងវីតាមីនអា (A) ដែលជាសមាសធាតុសំខាន់ណាស់សម្រាប់សុខភាពភ្នែក ហើយការបរិភោគការ៉ុតក្នុងបរិមាណសមល្មមអាចជួយការពារពីការបាត់បង់នូវចក្ខុវិស័យផងដែរ។ បន្ថែមលើសពីនេះ សារធាតុចិញ្ចឹមដែលមាននៅក្នុងការ៉ុតមួយចំនួនក៏អាចជួយប្រឆាំងនឹងជំងឺមហារីក ពិសេសជួយទប់ស្កាត់ដល់ហានិភ័យនៃការកើតជំងឺមហារីកសុដន់ទៀតផង។

៤- ប៉េងប៉ោះ (Tomato)

ប៉េងប៉ោះ គឺជាបន្លែមួយប្រភេទដែលមានផ្ទុកនូវថាមពល32កាឡូរី ប៉ូតាស្យូមចំនួន427មីលីក្រាម និងវីតាមីនសេ (C) ចំនួន24.7មីលីក្រាម។ ទន្ទឹមនឹងនេះ ប៉េងប៉ោះ ក៏មានផ្ទុកសារធាតុលីកូពីន (Lycopene) ដែលជាសារធាតុប្រឆាំងនឹងអុកស៊ីតកម្ម។ តាមរយៈការស្រាវជ្រាវបានបង្ហាញថា លីកូពីន (Lycopene) និងបេតាការ៉ូទីន (Beta Carotene) ជួយទប់ស្កាត់នឹងជំងឺមហារីក និងជាពិសេស ក៏អាចជួយការពារជំងឺមហារីកក្រពេញប្រូស្តាតបានដែរ។

រៀបរៀងដោយ៖ អ៊ង គឹមងៀន

រក្សាសិទ្ធិដោយ៖ គ្រឹះស្ថានហាតប៊ុក

សៀវភៅ ចំណេះដឹងសកល ភាគ២